04.11.2026

       Урматтуу окурмандар! 2026-жылдын 31-декабрына чейин Университетибиздин колдонуучулары үчүн “Piri Keşif Aracı”, “Piri AI” жана “LİBDİS” платформаларына сыноочу байланыш ачылды.
Аталган платформалар тууралуу кыскача маалымат төмөндө берилет.
1. “Piri Keşif Aracı” - Университетибиз жазылган маалымат базаларын, ачык жеткиликтүү ресурстарды жана китепкананын электрондук каталогун бирдиктүү платформа аркылуу издөөгө мүмкүндүк берген академиялык издөө куралы.
Бул платформа окутуучулардын, изилдөөчүлөрдүн жана студенттердин илимий булактарга тез жана оңой жетүүсүн камсыз кылып, изилдөө иштерин жеңилдетет. Ошондой эле диссертацияларды издөө, мекеменин илимий басылмаларын көзөмөлдөө жана академиялык жарыялоолордун ортосундагы байланыштарды графикалык түрдө талдоо сыяктуу кеңири мүмкүнчүлүктөрдү сунуштайт.
• Piri Keşif Aracı платформасы менен таанышуу
• Piri Keşif Aracı деген эмне?

2. “Piri AI” - академиялык изилдөө, жазуу жана мазмун даярдоо процесстеринде жасалма интеллекттин мүмкүнчүлүктөрүн пайдаланууга шарт түзгөн платформа. Колдонуучу белгилеген темалар боюнча академиялык булактарды издеп, тиешелүү жарыяланган эмгектерди пайдалануу менен академиялык талаптарга ылайык материалдарды даярдоого жардам берет.
Автоматтык түрдө шилтемелерди жана библиографиялык көрсөтмөлөрдү түзүү, мазмунду редакциялоо, көп тилдүү колдоо жана Word форматында жүктөп алуу сыяктуу мүмкүнчүлүктөрү аркылуу академиялык иштерди аткарууну жеңилдетет.
Piri AI платформасын колдонуу үчүн @manas.edu.kg домениндеги корпоративдик электрондук почта дарегиңиз аркылуу каттоодон өтүшүңүз керек.
• Piri AI платформасы менен таанышуу
• Piri AI деген эмне?

3. “LİBDİS” - ар түрдүү академиялык жана тарыхый материалдар өзүнчө коллекцияларга топтолгон жана толук тексттерге жетүү мүмкүнчүлүгүн сунуштаган маалымат базасы.
Макалалар, диссертациялар, конференция материалдары, электрондук китептер, осмон тилиндеги макалалар, эски гезиттер, медицина жана саламаттык сактоо боюнча басылмалар сыяктуу бай коллекциялары аркылуу изилдөөчүлөргө ар кандай академиялык жана тарыхый булактарды бирдиктүү платформа аркылуу пайдаланууга мүмкүнчүлүк берет.
• LİBDİS деген эмне?

Бардык окутуучуларды, изилдөөчүлөрдү жана студенттерди аталган платформаларды сыноо мөөнөтүндө колдонуп көрүүгө жана алардын мүмкүнчүлүктөрүнөн пайдаланууга чакырабыз.

21.10.2026

       Урматтуу окурмандар! Университетибиздин окурмандары үчүн «Лань» электрондук китепкана системасына байланыш ачылды!
«Лань» - изилдөөчүлөр, окутуучулар жана студенттер үчүн иштелип чыккан заманбап электрондук китепкана системасы. Анда 403 университеттин жана көптөгөн алдыңкы басмаканалардын материалдары камтылган. Системада ар түрдүү тармактар боюнча 93 000ден ашуун окуу китептери, окуу куралдары, окуу-методикалык колдонмолор, монографиялар, лекциялардын курстары жана илимий журналдар сунушталат. Материалдар орус тилинде берилген.
«Лань» электрондук китепкана системасына бул шилтеме аркылуу кире аласыздар: https://e.lanbook.com/
Университеттин аймагында системага логин жана сырсөзсүз кирүүгө болот. Ошондой эле жеке каттоодон өтүү аркылуу университеттин аймагынан тышкары жерден да системаны пайдаланууга мүмкүнчүлүк бар.
Пайдалуу шилтемелер:
• Көп берилүүчү суроолорго жооптор
• Колдонуучулар үчүн кыскача нускамалар: окутуучулар үчүн жана студенттер үчүн.

12.10.2026

       Урматтуу окурмандар! 2026-жылдын 11-ноябрына чейин университеттин колдонуучулары үчүн EBSCO компаниясынын инженерия, математика жана табигый илимдер тармактарындагы билим берүү жана илимий изилдөөлөрдү колдоого арналган маалымат ресурстарына сыноочу байланыш ачылды.
Сыноочу байланыштын алкагында төмөнкү маалымат базалары жеткиликтүү:
1. Engineering Source - машина куруу, электротехника, курулуш, энергетика жана башка багыттар боюнча материалдарды камтыган инженердик дисциплиналар боюнча толук тексттүү маалымат базасы. Анда 1 493 толук тексттүү журнал жана тармактык басылмалар бар.
2. eBook EngineeringCore Collection - алдыңкы эл аралык басмаканалардын инженердик илимдер боюнча электрондук китептеринин адистештирилген жыйнагы. Инженериянын жана технологиялардын ар түрдүү багыттары боюнча 7 800дөн ашык электрондук китепти камтыйт.
3. Inspec with Full Text - IET (Institution of Engineering and Technology) уюму менен биргеликте түзүлгөн физика, электроника, электротехника, компьютердик илимдер жана машина куруу боюнча абройлуу маалымат ресурсу. Анда 1 367ден ашык активдүү толук тексттүү илимий журнал, ошондой эле Inspec маалымат базасынын уникалдуу индекстөө мүмкүнчүлүктөрү камтылган.
4. Mathematics Source - таза жана колдонмо математика, статистика жана математикалык моделдөө боюнча адистештирилген толук тексттүү маалымат базасы. Анда 816 активдүү толук тексттүү журнал жана мезгилдүү басылма бар.
Ресурстардын жалпы көлөмү: инженердик илимдер, математика, физика, маалыматтык технологиялар жана билимдин чектеш тармактары. Жыйнактар илимий журналдарды, мезгилдүү басылмаларды жана 7 800дөн ашык электрондук китепти камтыйт.
Кимдер үчүн: инженердик жана табигый илимдер багытындагы факультеттердин окутуучулары, илимий кызматкерлери жана студенттерине.

Кирүү шилтемеси: https://research.ebsco.com/c/jxjadt/?db=e230tww,egs,int,msf